𝟏. ∀𝒙∀𝒚(∀𝒛(𝒛 ϵ 𝒙 ⇔ 𝒛 ϵ 𝒚)→ 𝒙 = 𝒚) مُسَلَّمَهٔ تَوْسِیْع

توسیع کا منطقی، وجودی اور اجتماعی تجزیہ: نظریۂ طاقِم کا مسلمۂ توسیع

یہ تحقیقی مقالہ نظریۂ طاقِم کے دوسرے اہم مسلمہ، مسلمۂ توسیع کا مطالعہ کرتا ہے۔ یہ مسلمہ (توسیع) یہ طے کرتا ہے کہ دو طاقم صرف اور صرف اسی صورت میں برابر ہوتے ہیں جب ان کے عناصر (یا ارکان) عین ایک جیسے ہوں، قطع نظر اس کے کہ ان کا ظاہری نام یا اندرونی تعریف کیا ہے۔ اس اصول کا ترجمہ فلسفۂ وجود اور علامہ اقبال کے تصورِ ملت میں جوہر اور عمل کی بنیاد پر شناخت کی تشکیل کے طور پر کیا جاتا ہے۔ آپ اس مسلمہ کو مسلمۂ شناخت بھی کہہ سکتے ہیں۔

ریاضیاتی اظہار

∀𝒙∀𝒚(∀𝒛(𝒛 ϵ 𝒙 ⇔ 𝒛 ϵ 𝒚)→ 𝒙 = 𝒚).

(ہر طاقم ایکس اور وائے کے لیے، اگر ایکس کے عناصر بالکل وہی ہیں جو وائے کے ہیں، تو ایکس اور وائے مساوی ہیں)

باب اول: توسیعیت کا منطقی معیار اور ارادیت سے تقابل

ںـ ۱.۱۔ مسلمۂ توسیع کا بنیادی مفہوم: اجزاء پر مبنی مساوات

مسلمۂ توسیع نظریۂ طاقِم کے بنیادی اصولوں میں سے ایک ہے۔ یہ طاقِم (سیٹ) کی تعریف کرتا ہے اور یہ طے کرتا ہے کہ طاقِم کی شناخت اس کے اندرونی اجزاء یا عناصر (یا ارکان) سے ہوتی ہے، نہ کہ اس کے ظاہری نام، ترتیب یا کسی اور خارجی وصف سے۔

اس مسلمہ کے مطابق، اگر طاقِم اے اور طاقِم بی کے پاس بالکل وہی عناصر زیڈ ہیں (یعنی جو عنصر اے میں ہو وہ بی میں بھی ہو اور اس کے برعکس)، تو یہ دونوں طاقم ریاضیاتی طور پر ایک ہی چیز ہیں (اے = بی)۔ مثال کے طور پر، ریاضی میں، {سیب، کیلا} ہمیشہ {کیلا، سیب} کے برابر ہوتا ہے، کیونکہ ان کے عناصر کا طاقِم ایک ہی ہے۔ یہ مسلمہ ریاضی دانوں کو یہ ثابت کرنے میں مدد دیتا ہے کہ اگر دو طاقموں میں ایک جیسے عناصر ہیں تو وہ برابر ہیں۔

ںـ ۱.۲۔ توسیعیت بمقابلہ ارادیت

مسلمۂ توسیع کا مفہوم منطق کی دو بنیادی اصطلاحات سے گہرا تعلق رکھتا ہے

توسیعیت: یہ کسی شے کی پہچان اس کے عناصر یا خارجی مظاہر کی بنیاد پر کرتی ہے۔ یعنی 'کیا موجود ہے'؟

ارادیت: یہ کسی شے کی پہچان اس کی اندرونی تعریف، نام یا خصوصیات کی بنیاد پر کرتی ہے۔ یعنی 'اسے کیا کہا جاتا ہے'؟

منطق میں، توسیعیت کا اصول یہ کہتا ہے کہ اگر دو اصطلاحات کے ظاہری نام مختلف ہوں (ارادیت میں فرق ہو)، لیکن ان کا اطلاق یکساں بیرونی عناصر پر ہوتا ہو (توسیعیت ایک طرح کی ہو)، تو وہ حقیقت میں مساوی ہیں۔

: مثال کے طور پر، اگر ہم دو گروہ ایکس اور وائے کو دیکھیں ایکس: "وہ لوگ جو قرآن، کعبہ، اور حضرت محمد صلی اللہ علیہ وسلم کو آخری نبی مانتے ہیں" (تعریف/ارادیت)۔

وائے: "اسلامی ملت" (نام/ارادیت)۔

اگر ایکس کے تمام اجزاء وائے میں ہوں اور وائے کے تمام اجزاء ایکس میں ہوں (یعنی دونوں کے بنیادی عقائد ایک ہوں)، تو مسلمۂ توسیعیت کے مطابق ایکس = وائے ہے۔ ان کی ظاہری تعریفوں یا ناموں کا فرق (جیسے 'مصری مسلمان' اور 'عراقی مسلمان' کا فرق) اہمیت نہیں رکھتا۔

باب دوم: اقبال کا فلسفۂ ملت: شناخت کی وحدت

علامہ اقبال نے مسلمۂ توسیعیت کو سیاسی اور اجتماعی شناخت کے ایک متحرک فلسفے میں تبدیل کیا۔ ان کے نزدیک قوم کی مساوات اور وحدت ظاہری نام یا جغرافیہ (ارادیت) کی بجائے صرف مشترکہ اصولوں (توسیعیت) پر قائم ہے۔

ںـ ۲.۱۔ ملت: جوہر کی یکسانیت پر مبنی طاقم

اقبال کا تصورِ ملت (قوم) مسلمۂ توسیع کا ایک بہترین سماجی و اخلاقی ترجمہ ہے۔ ملت کی تعریف کسی جغرافیائی حد (وطن) یا نسل و رنگ کی بنیاد پر نہیں ہوتی، بلکہ مشترکہ جوہر یعنی عقائد و اصولوں کی بنیاد پر ہوتی ہے۔

اقبال مغربی قوم پرستی (جو وطن کو بنیاد بناتی ہے) کو اسلامی قومیت کے لیے ایک "عظیم خطرہ" سمجھتے تھے۔ مغربی وطنیت جغرافیہ (ایک نام اور ایک حد بندی) کی بنا پر انسانوں کو تقسیم کرتی ہے، جب کہ اسلامی ملت بنیادی اصولوں (عناصر) کی یکسانیت کی بنا پر ایک عالمگیر وحدت قائم کرتی ہے۔

اقبال فرماتے ہیں کہ ملت کے لیے ایک ہونا ضروری ہے، اور وہ وحدت عناصر کی یکسانیت سے حاصل ہوتی ہے

منفعت ایک ہے اس قوم کی نقصان بھی ایک

ایک ہی سب کا نبی دین بھی ایمان بھی ایک

حرم پاک بھی، الـلّٰه بھی قرآن بھی ایک

کچھ بڑی بات تھی ہوتے جو مسلمان بھی ایک

یہ شعر مسلمۂ توسیع کا کائناتی اعلان ہے۔ اگر دو گروہ (ایکس اور وائے) کے عقائد کے تمام عناصر (نبی، دین، ایمان، حرم، الـلّٰه، قرآن) یکساں ہیں، تو یہ دونوں گروہ ایک ہی ملت (ایکس = وائے) ہیں، قطع نظر اس کے کہ وہ دنیا کے کس کونے میں ہیں۔

ںـ ۲.۲۔ وطنیت کا رَدّ: نام کی نفی

اقبال نے وطن کو ایک نام یا بت قرار دیا، جو مذہب (جوہر) کی اصل روح کو ختم کر دیتا ہے:

ان تازہ خداؤں میں بڑا سب سے وطن ہے

جو پیرہن اس کا ہے، وہ مذہب کا کفن ہے

وطنیت نام کی بنیاد پر الگ شناختیں بناتی ہے اور ملت کی توسیع پر مبنی وحدت کو پارہ پارہ کر دیتی ہے۔

اجتماعی خودی (بے خودی) کا استحکام اسی میں ہے کہ فرد اپنے آپ کو اس ملت کے وسیع دریا میں ضم کر دے جو بنیادی اصولوں کی یکسانیت پر قائم ہے، تاکہ اس کی شناخت (خودی) دائمی ہو جائے۔

باب سوم: شعریات میں جوہر، نام اور عمل کا توازن

شعری اور عرفانی فکر میں بھی اس اصول کی گہری بازگشت ملتی ہے کہ کسی شے کی حقیقی قدر اس کے جوہر یا کام میں پنہاں ہے، نہ کہ اس کے نام یا صورت میں۔

ںـ ۳.۱۔ جوہر کو دیکھ، نام کو نہ دیکھ

فلسفیانہ اور صوفیانہ فکر میں یہ بات مسلم ہے کہ دنیاوی اشیاء کی حقیقت ان کے نام یا صورت سے ماورا ہوتی ہے۔ جوہر وہ بنیادی عنصر ہے جو کسی چیز کی شناخت کو قائم رکھتا ہے، جب کہ اعراض (حوادث) یا نام بدلتے رہتے ہیں مسلمۂ توسیعیت اسی جوہر پر زور دیتا ہے۔ شاعر اس جوہر کو پہچاننے کی تلقین کرتے ہیں اور نام کی فریب کاری سے خبردار کرتے ہیں

غیر جوہر نہیں اعراض سے ان کو کچھ کام

رنگ و بو پر نہیں صاحب نظراں جاتے ہیں

یہ شعر توسیع کے معیار کو مکمل طور پر بیان کرتا ہے: جوہر (جو طاقِم کا عنصر ہے) ہی حقیقت ہے، اور صاحبِ نظر (وہ شخص جو مساوات کو درست پرکھتا ہے) طاقِم کے ظاہری اعراض، رنگ اور بو (یعنی نام، صورت یا محل) کو نظرانداز کر دیتے ہیں۔

ںـ ۳.۲۔ نام بَڑا اور دَرْشن چھوٹے: کام کی اہمیت

اردو زبان میں ایسے محاورے اور اشعار ملتے ہیں جو اس بات کی تائید کرتے ہیں کہ کسی شے کی قدر اس کے اندرونی مواد یا کام پر منحصر ہے، نہ کہ اس کے ظاہری نام پر۔

نام بَڑا اور دَرْشن چھوٹے: یہ ضرب المثل اس حالت کے لیے استعمال ہوتی ہے جب کسی کا نام تو بہت شاندار ہو، لیکن اس کے اوصاف، صفات یا کام (درشن/توسیعی مواد) اچھے نہ ہوں۔ یہ بالکل اس فکری تضاد کو بیان کرتا ہے جہاں طاقم کا نام (ارادیت) شاندار ہے، لیکن اس کے اجزاء (توسیع) ناقص یا کم ہیں، اور نتیجتًا وہ طاقِم کسی دوسرے طاقِم کے برابر نہیں ہو سکتا۔

صورت اور حقیقت: صوفیانہ فکر میں صورت (ظاہری ہیئت) کے مقابلے میں حقیقت (باطنی جوہر) کی تلاش پر زور دیا جاتا ہے۔

شمس مغربیؒ کی شاعری میں بھی وحدت الوجود (وحدت در کثرت) کے ذریعے یہی نقطہ بیان کیا گیا ہے کہ اگرچہ ذاتِ حق کئی لباس (کثرت) میں ظاہر ہوتی ہے، لیکن ان تمام ظواہر میں جوہر ایک ہی ہے ۔

باب چہارم: حتمی نتیجہ اور اخلاقی فریضہ

مسلمۂ توسیع اس آفاقی سچائی کو رسمی شکل دیتا ہے کہ کسی بھی شے، گروہ، یا حقیقت کی پہچان اس کے بنیادی عناصر کی مماثلت سے قائم ہوتی ہے۔

منطقی سطح پر: یہ اصول ریاضیاتی مساوات کو طاقم کے عناصر کے ساتھ جوڑتا ہے۔

اجتماعی سطح پر (اقبال): یہ مسلمہ کہتا ہے کہ جغرافیائی ناموں (ایکس)، رنگ اور نسلوں (وائے) کا فرق بے معنی ہے؛ ایک ملت کی شناخت صرف اس وقت یکساں ہوتی ہے جب اس کے بنیادی اصول (زیڈ) یکساں ہوں۔

اقبال کا فکری پیغام یہ ہے کہ مسلمان قوم کا جوہر (توسیع) توحید، نبی اور قرآن پر مبنی ہے۔ اس جوہر کی یکسانیت ہی حقیقی اتحاد (مساوات) کی ضمانت دیتی ہے۔ لہٰذا، اخلاقی فریضہ یہ ہے کہ ظاہری ناموں (وطن، گروہ، فرقے) سے اوپر اٹھ کر بنیادی عناصر (عقائد اور عمل) پر توجہ دی جائے، تاکہ ملتِ اسلامیہ ایک طاقم کے طور پر اپنی حقیقی اور یکساں شناخت کو برقرار رکھ سکے۔

طاقِمِ مُعَرّٰی

مُسلمۂ توسیع کا ناقابل تردید پہلو طَاقِمِ مُعَرّٰی کا وجود ہے جسے ہم مُسلمۂ وُجُود سے ملا کر پڑھیں گے کیونکہ کم ازکم ایک طاقِم موجود ہے جو خود اپنے مساوی یا اپنا ہی نمائندہ ہے یعنی

∃𝒙 (𝒙 = 𝒙).

اور کسی بھی طاقِم کی شناخت خود اس کے عناصر سے ہے یعنی

∀𝒙∀𝒚(∀𝒛(𝒛 ϵ 𝒙 ⇔ 𝒛 ϵ 𝒚)→ 𝒙 = 𝒚).

اب آپ فرض کریں کہ ایک ایسا طاقِم ہے جس کا کوئی عنصر ہی نہیں ہے یعنی

Ø = {} = ∅ = 𝟎

اور ایسے دو یا زائد طواقِم ہوں تو وہ دراصل ایک ہی طاقِم ہے کیونکہ آپ دو یا زائد صفروں کو الگ الگ قرار نہیں دے سکتے۔ دیکھو

𝟎 = 𝟎

فقط

سہیل طاہر

سیالکوٹ

مُسلمۂ وُجُود

مُسلمۂ زوج ساز